biblioteca.milladoiro.malpica

Boas novas 1: Humor e cerebro feliz

2012-02-10T18:01:00.004+01:00

Imos inaugurar hoxe unha nova sección que tentaremos manter tódalas fins de semana: trataremos de ofrecervos cada semana unha boa nova. Porque se producen tódolos días descubrimentos, sucesos, pasos adiante... que fan que vivamos máis felices. Por que a carón de toda esa sarta de despropósitos que vemos nos telexornais, milleiros de cidadáns en todo o mundo traballamos para avanzar, para vivir nun MUNDO MELLOR.
Pensamos que é necesario pois, cada vez con máis frecuencia e mesmo sen decatarnos, poñemos a mirada só nas cousas negativas de canto vai/nos vai sucedendo. E precisamos manter unha certa dose de optimismo: en nós mesmos e na Humanidade.
Inauguramos hoxe esta sección co estudo levado a cabo pola catedrática de Bioquímica da Universidade de Navarra Natalia López Moratalla e presentado este luns no XL Seminario de Centros Educativos desa universidade.
No seu estudo, a profesora explica o mecanismo cerebral que nos fai rir, concluíndo que a risa é convivencia: "Las personas que nos hacen reír nos hacen felices no tanto porque nos hacen pasar un buen rato, sino porque en el fondo, cuando nos reímos, aunque las cosas estén muy negras, todo se relativiza un poco y eso nos fortalece mucho el cuerpo también"

AQUI un artigo que explica o mecanismo
Conclusión: rir, modifica o noso cerebro, fortalece o carazón e xenera respostas físicas positivas.
Pois... Alá! A rir toda a fin de semana!

O falcón de mentira

2012-02-09T16:29:00.004+01:00

Hai xa días que soupemos deste asunto: a empresa Ecotactical Tecnologies puxo en marcha este sistema de control do andacio de gaivotas no porto de Vigo.
Trátase dun robot con forma de falcón que, controlado desde o chan por un operario, cumple a misión de espantar ás gaivotas que o consideran un dos seus depredadores naturais.
Coñecementos escolare aplicados ó mundo da tecnoloxía e a empresa.
O certo é que a abundancia desas aves estaba a representar xa un moi severo problema para as empresas e traballadores que desenvolven o seu labor nese porto no que cada madrugada móvense miles de toneladas de peixe
O caso é que esta xente son un grupo de mozos que saltaron directamente desde as aulas da Universidade Politécnica de Madrid ó mundo da empresa e aplicaron os seus coñecementos ate patentar un sistema de control de plagas.
Persoalmente paréceme unha empresa con moito futuro pois ofrecen algo moi necesario non só nos portos, tamén nos parques eólicos, nos aeroportos, piscifactorías...
Unha excelente iniciativa!

Un remedio

2012-02-01T15:24:00.002+01:00

Vímolo na casa de Chispa e... encautounos!

Por que se chaman Sisargas?

2012-02-01T15:09:00.001+01:00

A través de Arqueotoponímia descubrimos a posible procedencia do nome das nosas illas.
Xa o P. Sarmiento, no s. XVII nos propuxera a relación entre Sisarga e César (ver Anuario Brigantino, 1944 na páx. 44) e agora aparécenos un documento na bilbioteca da Universidade de Brown do s. XVI no que a illa é chamada Caesárea.
O topónimo nas suas variantes Cesarga o Sesarga foi usado para nomerar en 1568, polo seu parecido coa Sisarga da costa galega, a unha diminuta illa do arquipélago das Salomón: "no camiño vimos outra illa, á cal, por parecerse á que está xunto a Galicia, o piloto maior [Hernán Gallego] chamou Cesarga".
Bueno... esto da etimoloxía sempre ten algo de especulativo pero... a que é bonito?

Mira o bo que hai en min

2012-01-30T14:52:00.005+01:00

Velaí a nosa celebración do Día Escolar da PAZ
Este ano o lema foi... falar ben dos que nos rodean. E así o fixemos.
Pedimos ás familias que nos contasen algo positivo dos seus fillos e fillas e tamén ós nenos e nenas de cada aula que o fixeran dos seus compañeiros.
Os profes tamén o fixemos: coas nosas familias e cos compañeiros.
Unha gozada! Non temos o hábito de decirnos aquelas cousas que nos gustan dos outros... por algunha razón, se temos que dicir algo... non son precisamente as cousas máis positivas. É emocionante ler as opinións que os demáis teñen sobre nós. E moi bonito!
Estes día reparamos que que falar ben sementa a PAZ no noso entorno. A ver se perseveramos!!!
Pola semán tivemos na biblio talleres de papiroflexia con citas literarias e hoxe... CANTAMOS a canción que escoitades.
Feliz Día da PAZ.

Kobiños

2012-01-27T11:07:00.002+01:00

No concello lugués de Carballedo ten lugar unha das últimas aplicacións da ciencia (nesta ocasión : a Xenética) á vida diaria e á economía.
O asunto chega da man dun veterinario e gandeiro que decidiu cruzar o boi de Kobe coas excelentes razas de vacas galegas, obtendo así unha carne de magnífica calidade.
Son galegos de pai xaponés.
Agora, e dada a demanda que a carne deste boi ten no mundo, esperamos que os resultados económicos sexan animantes tanto para o pioneiro coma para os que demáis gandeiros que vexan nesta cría unha opción para facer mási viables as súas explotacións. De momento comercialízase baixo pedido a 15€/kg
E logo dirán que non movemos a economía!

Percebeiros

2012-01-19T17:26:00.001+01:00

A Agrupación de Percebeiros da Confraría de Pescadores de Malpica, ven de pór en marcha este sitio web no que expoñen a súa actividade profesional.

Ten o contido dun sitio profesional no que eles e elas atopan doadamente información que lles resulta necesaria (por exemplo sobre as aperturas mensuais)
Paréceme destacable o espazo chamado OFICIO no que inclúen algo tan necesario e sorprendente coma un banco de sons. Así, podemos escoitar desde un mencer en Barizo ata a serea da lonxa de Malpica...
O espazo PERCEBEIROS é, asemade, moi interesante: ofrecenos as caras e os nomes de cantos teñen relación comercial co percebe, así coma un mapa interactivo co que seguro, seguro aprenderemos moito sobre o tema.
Na miña opinión estamos ante un espazo necesario e longamente desexado para coñecer de cerca este traballo que, finalmente non é máis que iso: un traballo, un medio de vida, unha fonte de ingresos para numerosas familias, moitos deles pais e nais de escolares do noso colexio.
Mirando os videos ninguén poderá dicir que o percebe é caro. Non, oh!http://percebedemalpica.com/index.php

Agasallo de Reis

2012-01-06T12:04:00.001+01:00

Seguramente moitos xa o coñecedes pois leva varios días circulando pero paga a pena poñelo no espazo de colaboración e libertade que é este noso blogue por se alguén non o veu aínda e por volvelo ver.
A min dedicáronmo meus irmáns na cea familiar de noiteboa, co que conseguiron emocionarme. E eu dedícollo a tódolos meus compañeiros e compañeiras profesores coma min na escola pública que cada día chegan ó traballo cargados de ilusión, de proxectos, de ideas, de maneiras para chegar mellor a este rapaz ou a aquel... Xente que non se deixa vencer facilmente. Xente que cre no poder transformador da educación e que todos, ante ela somos iguais.
Tamén ás familias que saben da excelencia da escola pública e a aquelas que, a pesares do que diga a propaganda oficial, non poden escoller a que centro mandarán aos seus fillos e fillas para que teñan a seguridade de que están nas mellores mans.

Feliz día de Reis!

O vídeo vímolo AQUI

In memoriam

2012-01-05T12:57:00.001+01:00

Unha dor grande tránsenos hoxe pola morte de Isaac Díaz Pardo, última testimuña dunha Galicia que agora xa só é MEMORIA. E xa temos experiencia do que pasa coa memoria.
O sentimento de dor tórnase por veces en orfandade. Que será deste País onde xa hai nenos que non recoñecen a lingua propia e preguntan a quen a fala: por qué me hablas en catalán?
Para ti, Isaac, que seguirás a velar por nós alí onde estés. Entre os bos e xenerosos, seguro.

O meu país/ é verde e neboento

É saudoso e antergo,/ é unha terra e un chan.

O meu país/ labrego e mariñeiro

É un recuncho sin tempo/ que durme nugallán.

Q quece na lareira,/ alo na carballeira

Bota a rir.

E unha folla no vento/ alento e desalento,

O meu país.

O meu país/ tecendo a sua historia,

Muiñeira e corredoira / agocha a sua verdá

O meu país/ sauda ao mar aberto

Escoita o barlovento/ e ponse a camiñar

Cara metas sin nome/ van ringleiras de homes

E sin fin.

Tristes eidos de algures,/ vieiros para ningures,

O meu pais.

O meu país/ nas noites de invernía

Dibuxa a súa agonía/ nun vello en un rapaz.

O meu país/ de lenda e maruxias

Agarda novos días/ marchando de vagar.

Polas corgas i herdanzas

Nasce e morre unha espranza/ no porvir.

E unha folla no vento/ alento e desalento

O meu país.

A foto procede de AQUÍ

O poema, AQUÍ

Querido Isaac, chorarémoste e, unha vez limpas as bágoas, tentaremos seren dignos herderios da túa voz.

Felicidades fantásticas

2012-01-04T13:52:00.003+01:00

Felicitación nadal

View more presentations from biblioteca escolar milladoiro malpica.

A comunidade escolar do Milladoiro felicitavos as festas con esta presentación do que máis nos gusta este ano: os contos clásicos.
Feliz e fantástico ano para todos e todas!

Feliz 2012

2011-12-31T19:48:00.003+01:00

Estas son as árbores que, na porta de cada aula, falaban dos contos que escollemso para disfrutalos.
Con todos eles, felicitamos o vindeiro ano ós nosos amigos e amigas e desexamos un ano de conto para todos e todas.

Visita dos Reis Magos

2011-12-20T20:56:00.002+01:00

Hoxe visitáronnos SS.MM. os Reis de Oriente e agardaron ós nenos na biblio.
Nenos e nenas de Infantil, 1º e 2º leváronlles as súas cartas, falaron con eles e, a cambio, recibiron uns caramelos.
Cantos nervios ata que chegue o 6 de Xaneiro e vexamos se se cumplen os desexos!

Grazas, Maxestades!

O que temos que dicir e que todos estes rapaces forn moi, moi boíños durante todo o ano.
Para que o saiban!

Premio para Xián

2011-12-20T20:48:00.001+01:00

A semana pasada tivo lugar na biblio a entrega do Premio do Concello ó alumno que debuxou a que será a postal co que se agasallará a tódalos habitantes de Malpica.
O debuxo escollido foi o de Xián. E estas son as imaxes do acto no que contamos coa presencia da Sra. Concelleira de Cultura e do Sr. Alcalde.

Noraboa, Xián!

Dereitos dos nenos e nenas no Sahara

2011-12-10T12:54:00.000+01:00

63 anos despois da súa proclamación, segue sendo necesario lembrar esta data, 10 de decembro, na que a Asamblea Xeral das Nacións Unidas aprobou a Declaración dos Dereitos Humanos.

Necesario porque nin tan sequera nos países que asinaron esta declaración están garantidos estes dereitos en igualdade de condicións para toda a poboación. Non hai máis que botar unha ollada ao noso arredor, asomarse ás noticias.

Mais aínda así cabe pensar que un outro mundo é posible, que hai arrecendos espallados no ar que nos permiten prender unha candea pola esperanza, por estas xeracións, hoxe nen@s, adolescentes, que medran nas nosas aulas, ao abeiro das nosas Bibliotecas -das súas lecturas, da súa información, da súa formación- nen@s e adolescentes que se implican ilusionad@s e con empeño en proxectos coma "Coñecernos para querernos", nun intercambio persoal e de coñecementos con nen@s dos campamentos saharahuis, para quenes a apertura dunha biblioteca con (o Bubisher) ou sen (O Niño do Bubi) rodas, supón moito máis que un mundo de oportunidades. Para acceder á ilusión, aos soños, á formación, ao coñecemento doutras culturas, doutro idioma.

E con esa candea acesa, brincan faíscas que prenden en case un cento de Bibliotecas Escolares Galegas, que por todo o país escollen cada unha un fermoso álbum ilustrado para agasallar a ese recén estreado Niño do Bubi, porque, coma nas nosas propias Bibliotecas, toda inauguración é unha festa. A esa festa que é a lectura, nesas bibliotecas acubilladas na area, queremos enviar estes álbumes como aves portadoras de boa sorte, como bubishers* cheos de cor, imaxes, historias. Porque as nosas bibliotecas, @s nos@s lectores e lectoras, compartimos co Bubisher, cos lectores e lectoras das súas bibliotecas a crenza firme nos Dereitos Humanos, dende o seu 1º artigo: "Tod@s nascemos libres e iguais en dignidade e dereitos"

* O bubisher (Oenanthe leucopyga e Oenanthe leucura) é un paxariño tímido que vive na Península e tamén en África, aquí chamámoslle collalba negra e no Sáhara o seu nome significa paxaro da boa sorte, no dialecto hassaní é Bubchir بوبشير (o da boa nova) porque adoita aniñar e criar despois das choivas, o que quer dicer que medrará a herba, algo moi importante para quen ten gando.

Bubisher é tamén o nome dun autobús-biblioteca que circula entre os campamentos do Sáhara para levar lectura e información. Ou sexa, unha biblio... pero con rodas!!!

Se queredes unirvos á iniciativa de Álbumes para o Bubisher, só tedes que poñer os vosos datos xunto ao resto das Bibes Galegas.

Música e DDHH

Texto de Maribel Serantes (CEIP Os Casais)

Imaxe atopada aquí

Guía de lecturas para o Nadal

2011-12-06T22:25:00.004+01:00

Open publication - Free publishing - More book

Coma cada Nadal, achegámosvos a nosa selección de lecturas para pedirlles aos Reis.
Como este ano andamos a ler contos clásicos, fixemos unha selección deles, dos que máis nos gustan, dos mellor editados...

Só ahi que lembrar pedir un deles na carta de agasallos.
A escoller!

Apalpador e Nadal

2011-12-04T12:39:00.000+01:00

Chega o Nadal e conas festas volvemos sobre a figura do Apalpador.
Lembra que temos tamén unha páxina de recursos na que atoparás mil ideas para facer, para xogar...para aprender!

Panxoliñas

2011-12-01T18:03:00.010+01:00

Menuda se armou no cole coa chegada do novo disco de Mamá Cabra!
Non facemos outra cousa que cantar. E estas foron as panxoliñas escollidas polos diferentes cursos.
Agora anda Carme, a profe de música a ensaiar e ensaiar... e todos a cantar!
Tendes o libro na biblioteca... para seguir ensaiando e as cancións AQUÏIIIIIIII.....

Premios MEC ás Bibliotecas Escolares

2011-12-01T12:48:00.002+01:00

Un ano máis as Bibliotecas Escolares de Galicia estamos de noraboa. Veñen de facerse públicos os premios do Ministerio desta edición e, unha vez máis as bibliotecas galegas son as que acumulan un maior número de centros premiados.
PRIMICIA:
Modalidade A (centros de infantil, primaria, educ. especial e educación de persoas adultas):

1º premio, CEIP A LAMA, de A Lama, Pontevedra.

2º premio: CEIP CONDESA DE FENOSA, de O Barco, Ourense.

3º premio: CRA DE RIBADUMIA, Ribadumia, Pontevedra

3º premio: CEP XOSÉ MARÍA BREA SEGADE, de Taragoña-rianxo, A Coruña

Modalidade B (centros de ensino secundario, formación profesional, ensinanzas artísticas e escolas de idiomas):

3º premio: IES DE CELANOVA, Celanova, Ourense.

3º premio: IES ALEXANDRE BÓVEDA, de Vigo, Pontevedra.
Desde aquí, saúdamos con moito cariño e respeto ás comunidades educativas deses centros que reciben, deste xeito o recoñecemento da máis alta instancia educativa de España.
Este traballo silencioso, diario e sostido en anos que as BEs levan a cabo nos centros ... faríase tamén sen premios pero... o recoñecemento é un espaldarazo que non ten volta atrás.
Galicia ten a poboación moi diseminada pero os recursos concentrados. Ë por isto que estes premios para centros públicos e rurais teñen aínda maior valor nos tempos que corren. Sabémolo ben!

Sampedro. PARABENS!

2011-11-30T17:32:00.000+01:00

O escritor José Luís Sampedro ven de ser galardonado co Premio Nacional das Letras que concede anualmente o Ministerio de Cultura de España.
Con ese premio, o Ministerio pretende premiar toda unha vida dedicada ás letras. E así é no caso de Sampedro.
Unha extensísima carreira (ten 95 anos!)de escribir e escribir... sempre do lado da intelixencia e a sensibilidade.
Nos últimos tempos foi noticia o seu prólogo para o libro Indignaos! de Stéphane Hessel e tamén polo seu agudo análisis da visita do Papa.
Se eu teño que recomendar un libro seu, sen dúbida vos convido a ler La sonrisa etrusca.
Desde esta fiestra saudamos o premio e desexámoslle ó autor días de viño e rosas.

A cincenta que non queria comer perdices

2011-11-25T11:22:00.000+01:00

La Cenicienta que no quería comer perdices

View another webinar from Dunia L. M.

No Día Mundial contra a Violencia de xénero, deixamosvos esta nova versión do famoso conto.
E o enlace ó estudo que veñen de presentar desde o Ministerio de Igualdade sobre o que pensan do tema os adolescentes españois. Queda moito por andar!

Proxecto Bubisher

2011-11-24T15:23:00.001+01:00

Bubisher signigica: a ave que trae a boa sorte no Sahara.
E este ó o nome dun proxecto de animación á lectura que naceu como a idea dos nenos e nenas do colexio San Narciso de Marín (Pontevedra)
A actividade podesdes vela no video que acompaña esta entrada e completamente explicada neste enlace.
Hoxe traémola a esta páxina porque ándase a preparar un novo envío de libros no que imos participar.
As coordinadoras do programa seleccionan os libros que queren incorporar seguindo os criterios do seu propio Plan Lector e, con tal motivo, elaboraron un listado de libros do que nos escollimos un: A mi no me comas de OQO editora. ¿O criterio? Foi o último libro que incorporamos á nosa propia colección.
Se queredes participar, escollede AQUI o album que aportaredes. Seguiremos informando de como facer os seguintes pasos.

Visibilidade

2011-11-21T12:34:00.006+01:00

Hoxe, o xornal La Voz de Galica, ocúpase do noso traballo.
O pasado mércores e a raiz da nosa participación como ponentes no recén celebrado Congreso de bibliotecas escolares en tránsito, viñeron facer unha reportaxe unha xornalista e o fotógrafo. Atendéronos o director e a profe responsable da biblioteca. A conversa durou perto de dúas horas tentando explicar en que consiste o traballo da biblioteca escolar e cal é o seu papel dentro do deseño da nosa escola. Fixeron moitas fotos e tomaron moitas notas.

Gústanos que os xornais inclúan novas positivas. E se teñen relación con nós....gústanos máis!
Se queres ler todo o texto PREME AQUÍ.

O dereito a xogar: Pocoyó

2011-11-20T19:10:00.005+01:00

Xogo from Enrédate con UNICEF on Vimeo.
Este a no dedicaremos a Día Universal dos Dereitos Humanos ó dereito dos nenos e nenas a xogar (dereito nº 24) xa que enlazamos as actividades propostas cos temas que estamos a traballar: os contos clásicos e os xogos tradicionais.

Para elo preparamos unha páxina con videos, xogos, debuxos de colorear... Como aperitivo, aí queda este video de Pocoyó. A páxina está enlazada desde a sección de RECURSOS neste mesmo blogue.

Bibliotecas Escolares de Galicia: un exemplo, un modelo

2011-11-17T16:56:00.002+01:00

Biibliotecas Escolares en Tránsito [GAL] from Bibliotecas Escolares de Galicia on Vimeo.
Co gallo da celebración en Compostela os pasados 10,11 e 12 de Novembro do Congreso de Bibliotecas Escolares, a Asesoría de BEs de Galicia, decidiu aló polo mes de Maio, rodar un video que plasmara de modo gráfico o que hoxe é a realidade das bibliotecas escolares galegas.
Para elo, escolleron unhas cantas, entre elas a nosa, co fin de mostrar o que hoxe somos. Foron estas e poderían ser calesquera outras porque hoxe, as 500 BEs que formamos parte do PLAMBEsomos, no estado español exemplo de modernidade e renovación pedagóxica.
O vídeo son 7 minutos pero hai rodadas varias horas (no noso centro foi case hora e media de rodaxe) e, posiblemente se sigan a facer montaxes que recollan os materiais que quedaron fora desta primeira presentación. Cousas como as opinións das comunidades educativas, os diferentes servicios que ofertamos e o seu funcionamente, as opinións do profesorado responsable delas....
Valga esta primeira entrega coma mostra do que HOXE XA SOMOS e que foi motivo de envexa san para quenes no Congreso poideron ver as imaxes.
Este tipo de iniciativas fannos máis fortes pois dannos visibilidade e deixan patente a nosa realidade que, esperemos, non teña volta atrás.

Os anxos escuros

2011-11-05T21:23:00.002+01:00

Demos fin a esta semana tan intensa con varias actuacións (3º, 4º e 6º) Deixámosvos as imaxes da representación dos nenos e nenas de 6º que preferiron seren eles quen escribiran o seu propio texto. E así o fixeron.
O resultado foi excelente.

A figueira de Pelostortos

2011-11-03T15:39:00.006+01:00

O libro, como ben di Uxía é de OQO Editora e pasámolo moi ben preparando a lectura.
A historia, escrita por Ana García Castellano e debuxada por Mikel Mardones, é a recreación dun conto tradicional.
Podedes ver unha reseña do libro no blog de lecturas
Este é o caderno coa adaptación do texto

O curso pasado en imaxes

2011-10-27T18:21:00.003+02:00

O curso 2010/11 en imaxes on PhotoPeach
Probando unha aplicación que non usabamos hai tempo, fixemos esta presentación con algunhas imaxes do traballo do pasado curso. Seguro que vos gusta vervos!

II Semana das Lecturas Terroríficas

2011-10-26T18:12:00.013+02:00

Todo listo para a II Semana das Lecturas Terroríficas que celebraremos os días 2,3 e 4.
Contamos coa valiosísima axuda do profe Josecho para esa ambientación tan suxestiva que vedes.
Os libros que están expostos son, como non, para levar en préstamo. Moitos deles están duplicados na biblio así que preguntade antes de collelos.
E, polo demáis: felices e ARREPIAAAAAAAAAAAANTES lecturas!!!!
Por se vos interesa algunha foto en particular, este é o enlace ó álbum

Gravadoras novas!

2011-10-26T17:37:00.004+02:00

Aumentamos os nosos recursos con tres novas gravadoras de audio. Xa dispoñiamos de unha e quixemos aumentar o número pois é un aparelliño que se usa moito nas actividades das aulas.
Pedimos ás mamás da AMPA que nos fixeran unhas bolsiñas para que sexan máis doadas de levar e traer, e faltoulles tempo para facelas. Grazas.
Cada bolsiña leva: a gravadora, o manual de instruccións, as pilas e o cable para descargar.
De momento, nós facemos o préstamo ás aulas (ó/á profesor/a-titor/a) e este/a, se o cre convinte, empréstalla ós escolares.
Así que... xa podemos comezar con esas fermosísimos relatos dos contos que andamos a traballar.
E...coidádeas moito. Que teñen que durar!

1º Semana da Froita deste curso

2011-10-21T16:50:00.007+02:00

Un ano màis organizamos a Semana-da-froita. Como xa fixeramos en cursos anteriores, repartìmos a actividade en tres samanas diferentes ò longo do curso para poder degustar-coñecer-disfrutar as diferentes froitas que nos ofrece cada estaciòn do ano.
Coa axuda das nais da AMPA esta semana disfrutamos de:

luns: uvas e mandarinas
martes: batido de plàtano e laranza
mèrcores: brocheta de uvas, piña, mazà e mandarina
xoves: froitos secos: avelàs, anacardos, amèndoas, cacahuetes, pipas, noces...
venres: macedonia de plàtano, piña, pera, kiwi...

Descubrimos novos sabores. A algùns/nhas houbo que onsistirlles un pouquiño para que se decidiran a probar...Tamèn deu pè para falar das alerxias e intolerancias alimentarias.

Unha semana saudabel e moi, moi saborosa.
Agora esperaremos à pròxima no vindeiro trimestre.
Damos as grazas às nais que colaboraron de xeito entusiasta demostrando, unha vez màis, que nisto de educar todos imos no mesmo barco.

Alfabetización

2011-10-16T14:11:00.000+02:00

Hai algún tempo que andamos a darlle voltas a este concepto: ALFABETIZACIÓN.
Lendo a Daniel Cassany e a Felipe Zayas, confirmamos este pequeno lío que non é só da linguaxe.
Escoitades falar de alfabetización dixital pero... ¿que é iso?
Na nosa maneira de velo non se trata máis que da nova forma que toma a alfabetización no s. XXI.
Se no s. XIX a idea era ensinar a ler e escribir, agora é o mesmo pero... TAMÉN en pantalla.
Ningún dos nosos escolares estaría preparado para a vida se non soupera ler e escribir en calquera soporte (dixital incluído)
Ese é o reto.
Por iso as TIC non son ferramentas que facilitan a aprendizaxe. Non. Son espazos de comunicación e de construcción do coñecemento. Son novas formas de comunicación, novas prácticas culturais que xa forman parte do mundo que vivimos. Así que: alfabetización. A secas.
Por iso demandamos dotacións suficientes para os nosos escolares. Porque temos a obriga de alfabetizar. E, pola mesma razón, son parte da biblioteca.
En tódolos sentidos.

Mochilas

2011-10-07T11:01:00.003+02:00

O luns botarán a andar as Mochilas Viaxeiras. Xa é un programa coñecido por todos e todas pois leva entre nós desde hai varios anos (os primeiros en disfrutalas van agora en 4º da ESO!)
Cada semana chegarán ás vosas casas non coa intención de que leades canto vai nelas. Non. O obxectivo é animar a lectura en familia, que os adultos se reencontren con libros esquecidos de cando eran máis pequenos, ou que coñezan productos editoriais que descoñecen... Xogar entre pais e fillos... É impresionante o zume que lle tiran algunhas familias e que nos contan despois no caderno que vai dentro de cada unha.
O caderno é precisamente para iso: para que pais e nais nos dedes a vosa sinceira opinión sobre a actividade, sobre o contido... que nos fagades suxestións... que nos animedes a seguir... O que queirades pero vós, os adultos.
Podedes consultar o contido de todas AQUÍ.
Boa viaxe!

Pioneiras

2011-09-27T19:37:00.003+02:00

Open publication - Free publishing - More galicia

Finalmente este vran houbo o tempo necesario para rescatar como é debido esta publicación.
Como xa dixemos noutras ocasións trátase dunha escolma de mulleres científicas, empresarias, emprendedoras... todas elas galegas. As súas biografías formaron parte dunha exposición que co nome de Pioneiras percorreu Galicia no ano 2009 da man do xa desaparecido Servizo Galego de Igualdade.
Ofrecer modelos de muller é sempre un obxectivo educativo, moito máis se se trata de mulleres que sortearon dificultades sen pararse nelas fora porque así o quixeron, fora porque non lles quedou outra saída.
Ben. Eiquí está o caderno para o seu uso, disfrute e divulgación. Para todos vos.
Porque as mulleres pioneiras non son SÓ as de fóra.
E iso é algo que hai que contar para modelar o imaxinario.

Recoñecemento

2011-09-17T15:34:00.000+02:00

O diario dixital Que pasa na Costa escolleunos esta semana coma bitácora da semana.
É grande a actividade na rede da Costa da Morte así que agradecemos ós amigos xornalistas esta distinción que valoramos polo que ten de difusión da nosa actividade.
Corren tempos revoltos para a educación de feito non sabemos como faremos este curso para seguir presentes na rede e ofrecer ás familias, ós escolares e a cantos nos seguen a presencia á que estamos afeitos.
Do que estamos seguros é de que faremos canto esté na nosa man para que a calidade do noso traballo dentro das aulas non baixe. Lembrade que nos suprimiron case un 15% do profesorado ( seremos 3 profes menos que o curso pasado).
Razón de máis para agradecer este recoñecemento.

Noraboa, MESTRE!

2011-09-15T11:18:00.000+02:00

Agustí Fernández Paz ven de recibir o Premio Iberoamericano SM de Literatura Infantil e Xuvenil que lle será entregado o vindeiro 25 de Novembro no marco da Feira Internacional do Libro de Guadalajara (México)
O escritor vilalbés afincado en Vigo e, ante todo, un MESTRE. Porque dedicou á docencia toda a súa vida profesional e porque, tamén desde a literatura ten esa actitude: a de quen axuda a descubrir o mundo.
Na súa extensísima bibliografía hai libros para tódalas idades e, ten o don de resultar sempre interesante, sempre apaixoante, sempre cálido.
A súa obra, escrita en galego, está traducida a moitos idiomas o que fala da súa universalidade.
Resultará interesante ler a entrevista que ven de publicar un xornal galego na que o autor di cousas coma esta:

Se aquí lemos novela islandesa, tamén a nós nos poden ler fóra.

Tamén son de gran interés as súas reflexións sobre o valor dos contos tradicionais ou clásicos, opinións nas que coincide coa tamén escritora Ana Mª Matute:

As versións orixinais da Cincenta, Brancaneves ou Hansel e Gretel son terroríficas. Pero debaixo de cada conto popular hai un río subterráneo de ensinanzas para superar os medos e os perigos.

Saudamos o recoñecemento recibido por Agustín, este escritor a quen levamos no corazón.

As Bibliotecas Escolares Galegas despedimos a Mª Dolores

2011-09-13T19:41:00.004+02:00

Comezamos o curso con tristeza.

Temos que despedir á compañeira Mª Dolores Martínez Tobío, docente no IES Luis Seoane de Pontevedra e responsable da biblioteca escolar do centro. Hai só uns meses que Mª Dolores púxonos a Salvar Libros por centros de toda Galicia. Salvar os libros que pagan a pena, as linguas nas que se escriben eses libros, as bibliotecas nas que se gardan... a memoria dunha mestra que día a día traballou a favor da cultura e a educación.

Este é un documento colaborativo como tantos outros nos que Mª Dolores adoitaba participar co seu habitual entusiasmo. Desgraciadamente convocounos hoxe a súa despedida e pensamos nesta pequena homenaxe que xorde da mesma rede que ela axudou a tecer. Canto tempo e ilusión dedicados a Biblioiris, a súa bitácora vinculada á biblioteca escolar do instituto! Por iso os nosos blogs lamentan hoxe a súa ausencia. Por iso esta entrada será publicada por moitos outros centros, ademais dos que aquí figuran. Esperamos que este documento saiba representar tamén a tantas persoas que, desde a rede PLAMBE das bibliotecas escolares galegas, desexan expresar o seu pesar e as súas condolencias á familia e amigos da nosa compañeira. Son tantos os centros que a súa relación excede as dimensións deste documento.

Grazas Mª Dolores polas palabras, polas reflexións, polas propostas, polo tempo, polo que fixemos xuntos e que permitirá seguir camiñando pola ruta das bibliotecas escolares.

Cristina Novoa

Pilar Sampedro

Asesoría Bibliotecas Escolares

Imaxe das ligazóns: Rapaza lendo. Gustav Adolf Hennig

Cando as volvoretas provocan furacáns

2011-09-10T18:16:00.001+02:00

Hoxe chegounos unha triste nova: o inesperado pasamento de Mª Dolores, a quen todos coñeciamos polo seu correo electrónico mdamt. Ela era a responsable da Biblioteca do IES Luis Seoane de Pontevedra e foi unha das impulsoras e organizadoras da actividade Salvando Libros.
Choraremos a súa ausencia tentando seguir o seu exemplo de traballadora incansable e entusiasta, animadora, compañeira...MESTRA.
Na súa memoria, este poema de Manuel Antonio:

Fomos ficando sós

o Mar o barco e mais nós

Roubáronnos o Sol

O paquebote esmaltado

que cosía con liñas de fume

áxiles cadros sin marco

Roubáronnos o vento

Aquel veleiro que se evadeu

pola corda floxa do horizonte

Este oucéano destracou das costas

e os ventos da Roseta

ouretáronse ao esquenzo

As nosas soedades

veñen de tan lonxe

como as horas do reloxe

Pero tamén sabemos a maniobra

dos navíos que fondean

a sotavento dunha singradura

No cuadrante estantío das estrelas

ficou parada esta hora:

O cadavre do Mar

fixo do barco un cadaleito

Fume de pipa Saudade

Noite Silenzo Frío

E ficamos nós sós

sin o Mar e sin o barco

nós.

Desde Malpica, unha sentida aperta para a súa familia

Titorial Audacity

2011-08-30T11:48:00.001+02:00

Coñecemos o programa hai tempo pero este pareceume un titorial ben completo para aqueles que se estén a iniciar con el xa que fala das gravacións multipista. Certamente é unha ferramenta á que nas aulas se lle pode tirar moito partido. Mirade, se non , os nosos podcast do curso pasado.

Poesia mariñeira

2011-08-26T17:09:00.000+02:00

Contra vento e marea

2011-08-18T22:19:00.000+02:00

Muller e navegación tradicional

View more presentations from olgarodriguezdiaz.

La escuela fusilada

2011-07-18T10:45:00.009+02:00

Hai hoxe 75 anos do comezo da Guerra Civil Española. Hoxe veremos o aniversario en tódolos xornais, telexornais...
Convídovos a ver o documental La escuela Fusilada que explica o tratamento que sufriu escola e profesorado a mans do exército golpista.
Convén escoitar estas testimuñas, de viva voz.
O labor a II República a prol da educación foi inmenso: España viña dunha monarquía que convertira ó noso país no máis atrasado de Europa no que á educación se refería (30% de analfabetismo, 30.000 escolas en todo o territorio, non obligatoriedade da escolarización...)Do papel das Misións Pedagóxicas xa falamos neste blog
En tres anos, todo aquel traballo e aquela inversión rodaron polo chan. Os mestres? no mellor dos casos: no exilio.
O documental foi dirixido en 2006 por Iñaki Pinedo e Daniel Sánchez e premiado en múltiples festivais de cine. Este vídeo é o primeiro dunha serie de seis. Están todos nese mesmo espazo web.
Máis.

Pedras que falan

2011-07-15T09:44:00.001+02:00

Falaba eu hai uns días da importancia (e o placer) de ler a cidade. Pois, seguindo nesa onda, deixovos hoxe esta video de Bieito Romero con imaxes de pedras labradas, pedras simbólicas, pedras... bonitas! Todas elas están en Galicia: en casas, en igrexas, en hórreos... Só hai que andar cos ollos ben abertos para reparar nelas xa que, tal vez pola súa abundancia, pasamos cada día ó seu carón sen velas.
Somos tan, tan ricos que a súa presencia parécenos natural.
Propóñovos que abramos ben os ollos e hoxe, ó sair da casa fagamos o reconto das marabillas que nos rodean no noso entorno máis cercano. Non é preciso saber como se chaman, nen a súa historia...
Trátase de disfrutar e apreciar.
O mesmo autor (que, por certo é músico) publicou no 2009 coa editorial IR INDO o libro Xeometrías máxicas de Galicia
Para disfrutar de sermos ricos!

Homenaxe dos ENDL a A. Fernández Paz

2011-07-14T11:41:00.000+02:00

No Museo do Pobo no marco da celebracíon do 20 aniversario da creación dos ENDL

Ler a cidade

2011-07-13T13:16:00.001+02:00

Unha cidade é coma un libro: pódese ler. Para o viaxeiro, as formas das rúas, os diferentes estilos arquitectónicos, as casas-cadaver... mesmo as placas do nomenclator...TODO lle fala.
Un paso máis nesta lectura son as rutas literarias propiamente ditas: cando o escritor utiliza o escenario dunha cidade para situar o seu argumento, o lector gusta de visitar eses escenarios e re-vivir a historia lida.
Neste sentido, Barcelona é exemplar: ate 14 libros ambientados na cidade condal están ofertados nestas rutas. Deixovos o vínculo por se pasades por alí e queredes facer algunha delas
Comunidades como Andalucía teñen rutas, esta vez protagonizadas por autores: Cervantes, Lorca, Juan Ramón Jimenez, Vicente Aleixandre...
Tamén Castilla-La Mancha ofrece este servizo pero en liña, para que o viaxeiro se organice na intimidade.
Onte souben que a UDC organizou este verán un curso co moyivo central de Os libros arden mal, de Manolo Rivas.
Pareceume unha excelente nova e foi mágoa non telo sabido antes. Acariño a idea de que a Oficina de turismo da Coruña se apropie da actividade e nola ofreza: a nós e a cantos viaxeiros a demanden.
As grandes cidades (París, Londres, Dublín...) usan o seu patrimonio literario coma un atractivo. Por que non a Coruña?

Facer crebacabezas

2011-07-12T18:10:00.005+02:00

6 Leo%20peq_
Esto seguro que vos gusta!
Trátase dunha aplicación para facer crebacabezas que aparece incluída no portal Eduteka, Centro de Competencia da Beira interior en Portugal
Concretamente a aplicación é Jigsaw Planet e permite facer crebacabezas coa imaxe que escollamos con diferentes niveis de dificultade. Neste caso, eu escollín unha sinxeliña (6 pezas).
Pódense crear mesmo sen rexistrarse pero xa sabedes que, se queremos ter xunto todo o material que imos producindo é mellor facelo.
¡Que disfrutedes e lle tiredes partido!
(Só hai que premer sobre a imaxe para acceder ó xogo)

De novo...

2011-07-12T13:03:00.000+02:00

Vólvenos chegar este fermoso recoñecemento, esta vez da man de Hora de ler
acompañado dun texto que nos emociona profundamente pois pon de manifesto o que esta maneira de entender a escola ten de soño e utopía
Na primeira ocasión decidimos darllo a tódolos compañeiros nesta viaxe fantástica e laboriosa: é a nosa maneira de pór de manifesto o esforzado traballo dun feixe de profesores e profesoras que ADEMÁIS e nun labor explícito de voluntariado, fan realidade cada día nos seus centros o MUNDO DE POSIBILIDADES que para os nosos escolares representa a BIBLIOTECA ESCOLAR.
Seguimos sen ser quen de escoller 12 entre eles, pero enviarémolo a TODOS representados pola ASESORÍA DE BIBLIOTECAS ESCOLARES DE GALICIA.
Sen ela, nada deste milagre tería sido posible.

Mulleres e mar

2011-07-07T19:35:00.001+02:00

Este domingo celébrase por decimonovena vez a Festa do Precebe do Roncudo en Corme.
Pareceume interesante compartir con vós este documental sobre o traballo da muller nese marisqueo tan especial.
Feliz festa a todos e todas.

Aloumiños

2011-06-28T18:03:00.000+02:00

O Sunshine Award é un agasallo inesperado que nestes días convulsos nos chega da man dos amigos de Arquivos do Trasno, blog da biblioteca do IES Rafael Dieste.
Segundo parece, o agasallo concédese @s artistas cuxa positividade e creatividade inspira ós que os rodean.
¡Que bonito!
E, como mandan as normas, nós facémolo chegar a...¿12?...IMPOSIBLE!!!
Nós concedémolo a tódolos nosos lectores e lectoras, sen os cales este espacio electrónico non tería ningún sentido. Lembrade que precisamos dos vosos comentarios porque nos dan enerxía e forza para continuar. E boa falta nos vai facer!

Grazas a todos e todas por estar aí, por lernos, por acompañarnos, por serdes esixentes co noso traballo e utilizarnos coma o que pretendemos ser: unha fonte fiable de información.

GRAZAS a TODOS/AS

Os responsables de todo

2011-06-22T16:53:00.003+02:00

De Collages

Aquí tendes ós responsables desa festa tan chula: a Presidenta da nosa AMPA, a Concelleira de Cultura, o Director do Milladoiro, o Alcalde, a Directora do CRA e o Técnico de Cultura.
A todos e todas:

GRAZAS

Festa de Fin de curso

2011-06-22T16:36:00.002+02:00

Hoxe tivemos a festa de despedida do curso. O Concello de Malpica e a AMPA puxeron á nosa disposición uns xogos hinchables moi divertidos e unha excelente merenda. Tamén nos acompañaron os compañeiros e compañeiras do CRA que compartiron con nós o teatro de guiñol que tiñan previto.
Recibimos a visita do alcalde e de dous dos seus concelleiros, así como do Técnico Municipal de Cultura.
Foi unha festa divertida na que, ademáis, acompañounos o tempo e non choveu.
Algo de tristeza polos nenos e nenas que deixan o cole para sempre, algo tamén polos amigos ós que non veremos ata o curso que ven, polos profes que marchan... pero moita alegría polo traballo ben feito, polo descanso que se aveciña e polo moi cheos que se presentan os días de verán.
A todos e todas: GRAZAS!!!

Fin de curso

2011-06-20T16:42:00.001+02:00

Hoxe celebramos o final do curso. Con baile. Porque o baile é liberdade, alegría, acordo entre varios...o baile é felicidade e concordia.
E así foi.
Verónica, a profesora de Música foi a verdadeira artífice desto pois foi ela a encargada de escoller músicas, preparar coreografías...Por todo elo, felicitámola.
Mención especial merece a canción interpretada polos nenos e nenas de 1º Olelé-Molibá-Makasí, canción congoleña cantada en lingua lingala e que aprendemos no libro Canciones infantiles y nanás del baobá que tendes na biblioteca escolar para cando queirades seguir escoitandoa ou aprendendo outras tan bonitas coma ela. A verdade é que este ano, desde o Festival da Paz, foi o himno do cole porque a cantabamos por tódolos recunchos.
Ademáis, entregáronse as orlas a cantos rematachedes unha etapa escolar: EI de 5 anos e 6º de EP.
Uns marchades a outros centros e outros seguides con nós.
Tamén despedimos a algúns profes que o curso que ven xa non estarán aquí: uns porque terán o seu primeiro destino definitivo e outros porque decidiron concursar e solicitaron outros destinos.
A todos e todas: SORTE!!!
O álbum completo podedes velo e descargalo AQUÏ

Xogos tradicionais

2011-06-12T22:02:00.002+02:00

Este curso, algúns profes crearon no colexio un grupo para a posta en valor dos xogos tradicionais e, entre outras actividades para acadar ese obxectivo, decidiron pintar o patio cos debuxos alusivos ós xogos seleccionados e que aparecen en Chirlosmirlos, a Enciclopedia dos Xogos Populares escrita por Antón Cortizas.
Xa tiñamos esas fermosas columnas multicores e as mariolas do chan. E agora temos, ademáis estas preciosas imaxes das que esperamos que servan, de certo, para animarvos a xogar.
Non contarei as interioridades do making offpero pensade en profes vindo de noite (coa familia!) porque para proxectar cómpre escuridade... Así que...¡grazas!

Hoxe le...

2011-06-10T10:11:00.001+02:00

Trátase dunha das nosas actividades favoritas. Puxémola en mrcha hai anos e seguímola mantendo porque ten moito público e moitos aspirantes a actores/actrices...¡a pesares de que é no recreo!
Funciona da seguinte maneira: o Equipo de Biblioteca coloca a comezo do curso unha plantilla con filas numeradas no corcho da BE. Nela, os nenos e nenas que así o desexan van anotando os seus nomes. Xeralmente fanno por parellas. Nese mesmo momento escollen o libro que queren ler e comezan a preparar a lectura. É frecuente que pidan axuda ós seus profes-titores nesa preparación ou tamén ás profes que estamos na biblioteca.
Cando vai chegando o día, os escolares colaboradores preparan uns carteliños cos nomes dos/as lectores e o título do libro que colocaran nos dous puntos de publicidade que ten a actividade: un cabalete en cada unha das subidas das escaleiras coas que conta o centro.
E xa está!
Soa a síntonía, acomódase o público e...¡a ler!
Para esto foi xenial a adquisición do equipo de megafonía, pois escoitase moito mellor.
Sempre hai máis candidatos que días (martes e xoves de tódalas semanas) pero... o ano que ven...SEGUIMOS!!!
Esas que vedes son algunhas das imaxes que recollimos este curso.

Festa Fin de Curso

2011-06-09T18:10:00.004+02:00

Hoxe puxemos o remate a este curso que foi moi, moi intenso.
Organizamos a festa habitual na que entregamos os diplomas e uns agasallos ós nenos e nenas que nos axudaron no traballo durante todo o curso.
Non nos cansaremos nunca de agradecer ese traballo que, anque a vos non volo pareza é moi importante: levades o préstamo e as devolucións, organizades os Hoxe le..., ordenades os andeis, axudades ós pequenos, axudades nos traballos de preparación dos materiais para incorporalos á colección... Non seguirei. Só, e unha vez máis:

GRAZAS!!!

Tamén entregamos eses premios que esperades sempre con tanta intriga: os dos Máis leóns. Damos un a quen máis libros levou da BE de entre os escolares do 3º ciclo e outro para os do 2º. Este curso, e como novidade, a profesora de EI de 5 anos pediunos poder participar na festa entregando un agasallo a quen máis libros levou para ler coa familia da súa aula (eso das bolsiñas dou moito xogo!) e tamén se lle entregou. Resultado:

Nico, de 5º

Paula, de 3º

Noemí, de EI 5 anos.

PARABENS A TODOS!!!

O acto abrírono Pablo Parga, Samuel e Aday, alumnos de 6ºB, que leron O gato con botas, coa técnica do kamishibai. Ensaiaron moito moito e, como non podía ser doutro xeito, saíulles MALLADO!

E... ata o curso que ven. Que volveremos comezar. Algúns xa non estaredes aquí pero outros seguiremos a facer o noso traballo o mellor que sabemos sempre na onda de namorarvos dos libros e a lectura.

FELICAS VACACIÓNS... LENDO!!!

Ah! Que queredes saber os Premios! Vale.

Para os LEÓNS: cadanseu libro, unha mochila das Bibliotecas Escolares de Galicia e un Diploma acreditativo.

Para os/as colaboradores: unha libreta das Bibliotecas Escolares de Galicia, un boli multicor, un portaminas e un Diploma acreditativo.

Para todos/as. unha chapa da Hora de Ler das Bibliotecas Escolares de Galicia.

Semanas da froita

2011-06-09T17:55:00.004+02:00

Xa o fixemos o curso pasado cun gran éxito, e este curso repetimos.
Cambiamos o formato e, en lugar de facer un mes seguido, decidimos distribuir a actividade en tres semanas: unha en cada trimestre. A razón para facelo foi que, dise xeito, probariamos froitas de varias estacións do ano.
Trátase dunha actividade financiada pola Comunidade Eutopea e que leva por título: Plan de consumo de froita nas escolas que en Galicia conta coa colaboración do FOGGA (Fondo Galego de Garantía Agraria)
O Equipo de Convivencia distribúe polas aulas, antes do recreo froitas de diferentes clases que se varían cada día. Así, algúns nenos e nenas proban na escola froitas que nunca probaran e deciden se lles saben, se non... levándose verdadeiras sorpresas!
O día que fixémolas fotos había sandía, piña e amorodos. Pero tamén houbo mazá, pera, melón, pexegos, ameixas, plátano, mango,cereixas, papaia...Uhmmm!
Aplaudimos a idea do reparto en tres semanas pois cumpliu verdadeiramente o seu obxectivo.
E o ano que ven...máis!

A insoportable levedade das bibes galegas

2011-06-01T13:35:00.000+02:00

Hai proxectos que nacen marcados pola vulnerabilidade e a razón desta circunstancia non ten nada que ver coa falta de rigor ou a pouca entrega das persoas que os poñen en marcha. Máis ben ten que ver co feito de que nacen destinados a nadar contra corrente. Con todo, esa é a principal razón da súa existencia: xorden porque responden a unha necesidade non satisfeita pero compartida por un número crecente de persoas que senten que é posible compartir e facer viable o proxecto xuntos. Así naceu o movemento que cristalizou na iniciativa que todos coñecemos como PLAMBE. De xeito que dende hai algúns anos, esa iniciativa levou o mellor da creatividade e o esforzo de moitos docentes que xenerosamente regalaron o seu tempo e a súa capacidade de formar equipos e ilusionar a outros docentes en centros e centros de toda a nosa comunidade. Xuntos aprendemos a ser rigorosos e esixentes nos nosos proxectos, a crear espazos de aprendizaxe colaborativo, de cambios de estratexia, de achegamento ás novas tecnoloxías, de racionalización na xestión da información. Que ninguén se equivoque: os responsables das bibliotecas escolares non son seres evanescentes perdidos en vanas quimeras que tentan “roubar” horas a materias “importantes” para que o alumnado esmoreza entre mundos de ficción. Nada máis lonxe da realidade. Nun centro onde hai un equipo que xestiona a biblioteca de forma eficaz nótase. Os fondos adquírense con criterio, establécense acordos para xestionar a información, créanse espazos de colaboración e docencia compartida. Non é doado porque a maquinaria educativa ten unhas inercias difíciles de combater. A pesar de todo, estes docentes fórmanse e exercen a súa dura misión en horas non retribuídas, roubadas ás súas familias, ao descanso, ao lecer. Fomos coordinados con rigor e seriedade pola Asesoría de Bibliotecas Escolares pero sempre nos faltou o marco legal axeitado. A nosa misión é dura porque queda moito por definir. Na nosa inxenuidade e boa fe esperabamos conseguir progresivamente tempos e formación para seguir mellorando na nosa función se demostrabamos que eramos rigorosos e eficaces. Os nosos méritos como colectivo son dabondo coñecidos polos nosos gobernantes e acreditados por diferentes administracións e ámbitos a nivel estatal. Os numerosos e constantes premios anuais de boas prácticas concedidos polo Ministerio de Educación y Ciencia non caeron do ceo. Durante todos estes anos a formación recibida foi fundamental para levar a cabo actuacións rigorosas e enfocadas na dirección correcta.

Sabemos das cuantiosas axudas que a Dirección Xeral de Educación, Formación Profesional e Innovación Educativa, destina a outros proxectos, dos incentivos para a elaboración de contidos dixitais por parte das empresas editoriais, entre outras iniciativas. Non sería tamén interesante fomentar a produción de materiais propios e promover desde cada centro a estandarización de procedementos que axuden a xestionar a información entre o noso alumnado sen confiar todo a eses materiais externos que proceden da industria editorial, por valiosos que poidan ser? Por que non seguir aproveitando a experiencia e valía dos equipos das bibliotecas escolares nestes cometidos?. O noso empeño sempre foi crear nos centros pequenos focos que tentan estender esas boas prácticas de innovación e excelencia. Non entendemos este novo e repentino xiro na política de formación desta Dirección Xeral. Non nos parece xusto posto que, podemos dicir honestamente que, pola nosa banda, cumprimos con fartura. Ao desmantelar as estruturas que nos sosteñen o deterioro será proporcional ao entusiasmo e o esforzo investidos: inmenso e imparable. Algúns lembramos como o noso Conselleiro lanzou un bico ao aire ao despedirse dos asistentes aos últimos encontros despois dunhas entusiastas palabras de eloxio polos éxitos logrados polas bibliotecas escolares galegas a nivel estatal. Onde quedou ese entusiamo? Que interpretación debemos facer? O noso país pode permitirse tirar pola borda todo este traballo? E nós?. En que situación quedaremos agora diante das nosas comunidades educativas se despois de tanta insistencia é a propria Consellería a que nos invisibiliza?.

Colectivo dos equipos das bibliotecas escolares integradas no PLAMBE (Plan de Mellora das Bibliotecas Escolares Galegas)

Algo máis que pombas e globos

2011-05-29T20:49:00.000+02:00

Ese é o lema do 25 aniversario do SGEPe que suscribimos plenamente.
Desde a escola poñemos o noso gran de reflexión nos valores que constrúen a PAZ e, con ese fin organizamos as actividades da vindeira semana que están no caderno que repartimos onte e no deseño das cales participamos tódolos equipos de Dinamización do centro.
LECTURAS DRAMATIZADAS
Durante toda a semana na HORA de LER, os cursos que así o decidan actuarán na biblio para todos e todas dramatizando a lectura escollida. As lecturas seleccionaránse de entre as pre-seleccionadas polo E. de Biblioteca que xa están todas no expositor correspondente.
DEBATE_REFLEXIÓN sobre VALORES:
Asignamos un valor a cada nivel segundo o seguite cadro
E.I.- Xenerosidade
1º.- Amizade
2º.- Cooperación
3º.- Respecto e Tolerancia
4º.- Responsabilidade
5º.- Lealdade
6º.- Esforzo
Escribiranse as conclusións que serán lidas no acto do venres á tarde.
MURAL das MANS:
Sobre a plantilla do perfil da man de cada quen escribiremos a frase ou palabra que queiramos divulgar. Xuntas colocarémolas no arco da vella do mural colectivo que está a facer o E. de Convivencia.
LECTURAS PARA A PAZ:
Xa está montada a selección de libros que recomendamos para estas datas. No lugar habitual. Listas para que as levedes emprestadas.
CANTAR:
A profesora de música anda a preparar con todos e todas a canción We are the world para cantar xuntos.
VENRES 28:
Todos vestiremos unha camisola branca durante todo o día.
Pola tarde, no patio colocaremos o mural feito en común, leremos as conclusións dos debates nas aulas e cantaremos xuntos.

Salvados no Milladoiro

2011-05-26T18:40:00.004+02:00

Eiquí tendes algúns dos NOSOS libros salvados.
Felicitamosvos a todos e todas polo esforzo de memorización e por entender tan ben a actividade.
Os libros salvados polo noso cole foron:
Cocorico, en Educación Infantil
Animais de compañía, en Primaria
Prometemos poñelos todos!

Poemas para Lois

2011-05-26T18:40:00.002+02:00

A actividade de creación literaria deste ano consistía en facer poemas sobre un sentimento. A imitación de Lois, miramos cara adentro, buscamos un sentimento que nos emocione e tentamos poñelo en palabras.
Como vedes, houbo de todo. Os pequenos traballaron coas propostas do libro Que tal, vexetal? que axuda moito a falar de sentimentos. E os maiores...bueno..eses miraron ó seu interior e ¡vaia se toparon de que falar!
Coma decote, os poemas acabarán encadernados nun libro do que poderedes disfrutar na biblioteca.

Visitas e talleres

2011-05-26T18:40:00.000+02:00

Xa o xoves 19 e seguindo coas actividades do Mes dos libros e das Letras, recibimos ó ilustrador Abraham Carreiro que levou a cabo un interesante taller de ilustración cos nenos e nenas dos ciclos 2º e 3º.
Para os de 1º ciclo, tivemos un encontro cun contacontos que, polo que se ve, fíxolles disfrutar moito.

Festival das Letras

2011-05-26T18:39:00.000+02:00

O pasado luns 16 celebramos o Festival das Letras. Os de 6º non estaban no cole porque ían de excursión de fin de curso pero tódolos demáis, celebramos unha fermosa tarde literaria.
Na honra de Lois Pereiro, limos poesías que nós mesmos fixemos, explicamos as nosas razóns para salvar libros ou recreamos algunha obra que nos gusta especialmente.
Aí, anque con algún retraso, tendes imaxes do acto.

SALVADOS!!!

2011-05-17T19:02:00.001+02:00

SALVANDO LIBROS

Que libro salvarías ti?

Esta exposición xorde dun traballo colaborativo entre 96 bibliotecas escolares galegas e pretende ser unha chamada de atención sobre a importancia de apreciar, coidar e manter o noso patrimonio cultural escrito.

Pretendemos difundir a idea de que é imposible destruír os libros e os valores que neles se transmiten se somos quen de conseguir que formen parte de nós para sempre.

Maio 2011

Queremos dar moi especialmente as grazas a Jaime Eizaguirre Santillán, ex-alumno do IES Sánchez Cantón, que unha vez máis deseñou estes carteis tan fermosos para facer posible a actividade.

Podedes ver o perfil de Jaime, arquitecto e debuxante, aquí

e algunhas das interesantes cousas que fai aqui

e tamén aquí….

Grazas de novo, Jaime, pola túa xenerosidade

Moitísimos libros están a ser salvados nas nosas bibliotecas, que organizan as súas propias exposicións e actos.

Esta é só unha pequena escolma dos que representan a cada un dos centros que participaron na actividade.

Salvar un libro consiste en aprender de memoria un pequeno fragmento para simbolizar a asimilación de todo o seu contido. Entón xa seremos unha persoa-libro e poderemos preservalo para sempre.

A idea está baseada na obra de Ray Bradbury “Fahrenheit 451”.

Esta é a escolma de libros que representan aos centros de Educación Infantil

Open publication - Free publishing - More biblioteca

Esta é a escolma de libros que representan aos centros de Educación Primaria

Open publication - Free publishing - More biblioteca

Esta é a escolma de libros que representan aos centros de Ensino Secundario e algúns persoeiros relacionados co mundo das letras e a cultura

Open publication - Free publishing - More carteles

ESTA ACTIVIDADE FOI COORDINADA DESDE AS BIBLIOTECAS ESCOLARES:

IES LUIS SEOANE DE PONTEVEDRA

ESCOLA UNITARIA DE VIDE

Aquí están, todos xuntos, os libros salvados entre todos/as.
Emocionante.
Entrada elaborada por Charo

Salvando Libros: Infantil

2011-05-15T21:06:00.000+02:00

Open publication - Free publishing - More biblioteca

Esta é a relación de Libros salvados en Infantil.

As BEs Galegas: salvando libros. Primaria

2011-05-15T20:55:00.003+02:00

Open publication - Free publishing - More biblioteca

Co gallo do Día das Letras, 96 bibliotecas escolares galegas de entre as que formamos parte da rede do PLAMBE, puxémonos a SALVAR LIBROS. Explícome:
ó fío do argumento da novela Fahrenheit 451pensamos en que se iso sucedese hoxe...¿que libro salvariamos nós de entre os numerosos da literatura galega?
E puxémonos mans á obra.
O arquitecto e debuxante Jaime Jaureguizar, fixo para nós o deseño dos fermosos carteis que serven de soporte é fan posible a imaxe da actividade.
Mª Dolores e Sabela foron as encargadas de coordinar a parte conxunta da actividade, polo que lles damos as grazas. Uha vez máis: traballar xuntos multiplica os resultados.
Levamos meses preparando a actividade, coñecendo libros, afondando neles, lembrando os nosos favoritos... e memorizando parágrafos. Porque o que se lembra non desaparece.
Isto que vedes é o resultado dos libros que forn salvados en Primaria (un por centro para este caderno colectivo) Nos vindeiros días publicaremos o caderno de tódolos salvados no Milladoiro.
Pero agora, disfrutade destes.
Agora publico os salvados en Infantil :-)
E agora...¿que libro salvarías ti?

Aínda...

2011-05-15T20:35:00.000+02:00

Día do libro al

View more presentations from biblioteca escolar milladoiro malpica

...andamos a publicar actividades das que fixemos co gallo do Día Mundial do Libro porque este ano andan as datas todas un pouco descolocadas!
Iste foi o traballo que fixeron na aula de audición e linguaxe coa profe Susana: un convite a imaxinar!
A min paréceme unha das cousas máis marabillosas que facemos cando lemos.

Recursos: Lois Pereiro

2011-05-08T19:09:00.001+02:00

Pincha sobre a imaxe a accederás á páxina que preparamos con diferentes recursos sobre a figura do poeta de Monforte.
É moito o traballo que se fixo sobre este poeta desde os equipos de Biblioteca, os de Normalización, o Seminario Galán que xa nos ten afeitos ó seu magnífico traballo... De todo iso, nós seleccionamos aqueles recursos que nos parecen máis acaídos.
Sabemos que hai cursos que xa comezaron o traballo hai tempo (a páxina está enlazada na sección Recursos deste blogue) pero por se queda alguén sen comezar... hoxe deixámos aquí o enlace.
Esta semana iredes tamén rematando os poemas e os carteis cos libros salvados (se aínda non están)
Feliz traballo!

O noso Pablo: PARABEEEEEEEEEENS!!!

2011-05-06T10:11:00.000+02:00

Pablo, foi alumno deste cole. Pablo amaba a papiroflexia. Pablo era reflexivo e serio desde pequeniño. E, Pablo, hoxe ven de darnos unha grande alegría:
A universidade barcelonesa Pompeu Fabra ven de darlle un premio por obter unha fórmula matemática que confirma que a velocidade de enfriamento dun líquido é maior canto máis quente está
Pablo marchou do Milladoiro para o Alfredo Brañas de Carballo, logo para o Rosalía de Castro de Compostela. Alí continúa na Universidade.
Lembro a Pablo sempre formaliño, serio, moi interesado na papiroflexia...Polo seu interés no tema adquirimos os nosos fondos nesa materia e montamos un taller que durou varios anos e estaba moi concurrido.
Uns anos despois veu dar as grazas pola formación recibida en ALFIN. Lembro as súas palabras: Eu era o único que sabía como se fai un traballo- díxome. E eu pensei que só por iso xa pagaba a pena.

Valoramos neste premio dúas cousas: o recoñecemento a un traballo que, sen coñecelo polo miúdo sabemos que é serio, e o que ten de exemplar para os nenos e nenas que hoxe estudian con nós. Como fixemos hai uns días con Santi Romay.
A mensaxe é:

soña, aspira, quere... e apunta alto!

Podes acadar os teus soños.

Coma Pablo.

Sabesdes que temos por costumbre agasallar ós nosos escolares de 6º cun libro que contén as súas biografías escritas por eles mesmos. Gardamos os orixinais de todos. Esa é a foto que Pablo puxo de sí mesmo no ano 2004.

O resto podedes velo no artigo que aparece hoxe na Voz de Galicia

Eu leo para ti

2011-05-02T16:40:00.002+02:00

Iso foi o que fixemos hoxe: lemos para un compañeiro ou compañeira máis pequenos (había algúns que tiñan dous afillados!)
Nos días anteriores xa se presentaran: padriños e madriñas forn ás aulas onde están os seus afillados co fin de darse a coñecer. De paso, preguntáronlles polas súas preferencias literarias: xéneros, personaxes, autores... para escoller mellor o libro que lle lerían.
E hoxe foi o día.
Na miña opinión son uns imaxes belísimas.
Creo que repetiremos en anos sucesivos. Paga a pena.
Ah! Andabamos acelebrar o Día do libro. Pero...¿fai falta un motivo?

Salvando libros, na TV

2011-05-02T11:43:00.004+02:00

Salvar un libro

View more presentations from rebkblanco

No cole de Barallobre fixeron esta marabillosa presentación.
Chea de creatividade, sentido do humor e enxeño.
A que está ben clariño o que andamos a facer?

Palabras para Galicia de Ernesto Sábato

2011-05-01T21:10:00.001+02:00

Onte deixounos Ernesto Sábato que cumpliría cen anos o vindeiro 24 de xuño.
Coñeciamos a obra deste novelista, físico e pintor pero non sabiamos da súa estima por nós: polos galegos e galegas.
No ano 2002 o PEN Club de Galicia concedeulle o Premio Rosalía de Castro dándolle así a ocasión de visitarnos e coñecer a nosa terra.
Na súa Arxentina natal Sábato tivera ocasión de coñecer emigrantes galegos de quenes escribiu:

“Aquellos gallegos que conocí, siendo niño, en mi pueblo pampeano, gentes sencillas y respetuosas de sus tradiciones que se reunían para celebrar romerías al son de la gaita y los panderos. Gallegos que llegaron a la Argentina para engrandecerla, que trabajaron duro, que formaron nuevos hogares y que hoy sufren la misma angustia de todos los hombres y mujeres de mi patria; hundida en la miseria, arrasada por los explotadores y los corruptos”.

Máis tarde fíxose amigo de Lourenzo Varela, Dieste, Otero Espasandín... cos que compartía tertulias no café Tortoni de Bos Aires.
Admiraba a Rosalía de quen dixo:
"...que siendo fiel a sus raices y a su lengua supo crear una obra universal"

Sábato admiraba profundamente ó pobo galego pola nosa capacidade de resistencia, estoicismo e valor.
Pódese ver un estracto do famoso discurso AQUÍ
O texto completo está incluído nun dos volumes da serie Miradas Alleas publicada pola Xunta.
Despedimos, pois, a un home comprometido co seu tempo e o mundo que lle tocou vivir. Quédanos a súa obra

Libros en tódolos sentidos

2011-04-27T14:44:00.001+02:00

Open publication - Free publishing - More book

Como sabedes, o 23 de Abril de cada ano celebramos o Día Internacional do Libro. Comoqueira que este ano cadrou nas vacacións, nós repartimos as celebracións entre varios días. En realidade, celebramos o libro cada día do ano.

E, coma mostra este botón: o que fixemos cos libros no pasado curso.

Nese caderno que vedes, tentamos resumir algunhas das actividades que fixemos encol dos libros e a lectura no curso 2009/10.

Este curso que andamos está a ser máis ou menos igual. E o outro. E o outro máis... Porque os libros están no centro da nosa vida.

Coma ten que ser.

Felices días con libros!

Misións Pedagóxicas en Malpica

2011-04-15T12:22:00.004+02:00

Vealí a instantánea da que falabamos tomada na estrea de Retablo de fantoches, unha obra de títeres de Rafael Dieste. Corría o ano 1933.

Logo da estrea en Malpica, a Misión foi á Fonsagrada onde, ó parecer, quedaron pechados pola neve e aproveitaron para arranxar os monicreques. A Misión continuou por Galicia e logo seguíu o seu percorrido por España. Concretamente a Burgos e Cáceres onde, parece ser, Dieste coñeceu á que sería a súa muller.

A misión do 33: “...é un pouco especial. Por vez primeira faise coincidir o que é unha Misión normal co Museo do Pobo... Esta iniciativa consistía e dúas coleccións itinerantes de copias dos máis coñecidos autores españois, como Velázquez, O Greco, Murillo ou Goya, que se trasladaban nunha serie de caixas e eran explicados por algúns dos misioneiros. Ademais, copias impresas destas obras repartíanse entre os participantes e deixábanse nos centros receptores. Isto esixía unha determinadas infraestruturas. Tiñan que ser vilas onde puidese, cando menos, chegar unha furgoneta” en palabras de Eugenio Otero, comisario da exposición sobre as Misións Pedagóxicas.

AQUÍ pódese consultar o dossier completo da Exposición que organizaron o Ministerio de Cultura e a Fundación Giner de Los Ríos que estivo en Compostela no ano 2007

Agradecemos a información sobre a imaxe e o dossier a un dos nosos visitantes que nos deixou un amabilísimo comentario con eses datos.

Aniversario

2011-04-15T09:51:00.000+02:00

Onte cumpliuse o 80 aniversario da proclamación da II República Española.
Lembrábanos o amigo Mariano Coronas o intenso traballo que se fixo durante ela para aumentar a cultura dos españois: abríronse 13.000 escolas nun só ano.
Papel educador ó que contribuíu decisivamente a creación das Misións Pedagóxicas, proxecto educativo que tiña como propósito achegar a cultura ós núcleos máis afastados de todo o Estado. Consérvase unha fotografía da súa estadía en Malpica que, de momento, non temos.
Un ambicioso proxecto de modernización política, social e cultural de España en palabras do cátedro Ángel Viñas.
Non hai que esquecer, tampoco, que foi durante ela cando as mulleres conseguimos o dereito ó voto por primeira vez.
En definitiva: unha data para ter presente.
Un artigo para ler
E o excelente documental que vimos no Telediario de onte á noite.
A imaxe procede de alsurdelsur

Encontros PLAMBE 2011

2011-04-10T12:01:00.003+02:00

Vimos de aistir este pasado venres ós Encontros dos centros do PLAMBE, organizados pola Asesoría de BEs.

Unha nova ocasión para seguir confrontando as prácticas que os centros galegos desenvolvemos en torno ós libros e a lectura (en tódalas súas modalidades e funcións)

Valoro, especialmente, netes Encontros anuais a capacidade de quen organiza para sorprendernos, para avanzar... para abrirnos os camiños que precisamos e pór luz sobre eles.

Gustei especialmente do traballo das profesoras Baró e Mañá sobre avaliación: están a elaborar unha ferramenta magnífica que permitirá avaliar o trabllo das BEs, saber cales son os puntos fortes, os que precisamos mellorar... é dicir: o que precisamos para saber como traballamos e reconducir as nosas prácticas.

Teño un interés especial en achegarme á intervención do profesor José Antonio Cordón e o seu traballo sobre as redes sociais, a web 2.0 e as BEs.

O broche final púxoo Xosé Neira Vilas que ante nós foi desgranando as súas lembranzas biográfico-literarias: ¡un placer escoitalo!

O autor de Memorias dun neno labrego está este ano de celebración por cumplirse 50 anos da primeira edición dese libro, traducido a centos de linguas e que marcou o nacemento da literatura infantil e xuvenil en galego anque, como dixo o propio Neira Vilas, non foi escrito con esa intención. Pero nenos e nenas adoptárono e apropiáronse del.

Foron moitas as anécdotas e vivencias que nos trasladou coa naturalidade que o caracteriza. Valorei especialmente o descubrimento da revista infantil Zunzun e da antoloxía que dela fixo a profesora Ana Chouciño, malpicana á que coñecemos pero non este traballo que tentaremos conseguir canto antes polo seu doble valor.

Lembramos que tódolos materiais dos Encontros son accesibles no espazo Moodle da Asesoría.

A foto é de Loly Lago e AQUI podedes ver máis

Encontros

2011-04-07T12:39:00.008+02:00

Comezaron hoxe para os centros de nova incorporación e seguirán mañá para todos cantos estamos no PLAN de MELLORA das BIBLIOTECAS ESCOLARES de GALICIA, os ENCONTROS deste ano. Coma tódolos anos, lugar de encontro e reflexión sobre o que facemos cada día. Lugar de coñecemento e imaxinación de novos camiños a explorar. Lugar de conversa e definición de hacia onde queremos ir, como vemos o futuro e que podemos facer cada responsable, cada equipo, cada centro... para mellorar a competencia lectora, a informacional, a dixital... que podemos facer para contribuir a teren cidadáns máis informados, máis críticos... máis felices. Porque como ben dixo... alguén:

Non preguntes que pode facer o teu país por ti.

Pregunta que podes facer ti polo teu país.

E, a min esa frase, sempre ma pareceu un tratado completísimo. Os Encontros pódense seguir en directo as sesións plenarias. Persoalmente, ademáis de reencontrar ós compañeiros e compañeiras, teño especial interés por escoitar ás profesoras Baró e Mañá, que supuxeron o meu inicio neste mundo apaixoante das BEs. Coma decote, aprenderemos delas canto poidamos!

O texto nas bitácoras.

2011-03-30T18:13:00.000+02:00

Esquemas textuais

View more presentations from biblioteca escolar milladoiro malpica.

Últimamente andamos a reflexionar sobre os esquemas textuais e a súa importancia na didáctica. Ben sabedes que todo non se escribe igual e que non abonda con ter palabras, ademáis hai que ter moldes e formas. Porque cada soporte, cada medio, cada intención... adopta un formato que lle é máis acaído.
Hoxe falamos do texto electrónico.
Xa que andamos na lea de facer blogs de aula, non está de máis ter unha pequena guía de como escribir nos blogs.

O noso Santi

2011-03-24T12:12:00.001+01:00

Santiago Romay Lema. Actor. Malpicán. Bo e xeneroso.

Este é o noso Santi que ven de recibir onte á noite o Premio María Casares ó mellor actor secundario pola súa actuación na obra Un cranio furado.
Énchenos de ledicia saber recoñecido o teu traballo.
Persoalmente lembro o comezo de todo: as clases de teatro aficionado en Malpica, o castin para Mareas Vivas, a chispa que sempre tiveches, a timidez que te caracteriza, o bo fillo, o alumno, bo compañeiro e boa persoa que eras e segues sendo...
Admirable este rapaz que no discurso de agradecemento non esqueceu as súas raíces.

Un exemplo de traballo, constancia e ilusión para perseguir os soños.

Un de nós.

Parabéns, Santi!

Xa están aquí!!!

2011-03-23T10:48:00.000+01:00

Este é o blog da biblio do IES de San Hadrián (oficialmente chámase Urbano Lugrís)
Sentímos unha grande alegría ó velos na rede porque así saberemos deles máis acotío.As fiestras virtuais unen, nós xa o sabemos, e desde hoxe sentirémonos aínda máis perto de quenes durante nove anos son os nosos escolares e dos seus profes.

Xa sabedes que a biblio chámase Manuel María, na honra do noso querido poeta. Agora tamén ten nome o blog: Bibliogris. Parabéns ós profes que o fan posible.
Que dure!

Invisibles para nós mesmos?

2011-03-16T19:11:00.004+01:00

Supóñovos enterados da existencia da Expedición Malaespina. Trátase dun proxecto científico moi ambicioso ( 17 millóns de euros!) do Ministerio de Ciencia e Innovación que ten como obxectivo principal avaliar o impacto do cambio climático nos océnos e a influencia deste na biodiversidade.

Como vos deixo o enlace á páxina da expedición non me extenderei en detalles pero hoxe quero poñer de relevo que a participación dos investigadores galegos nela é abundántisima (30 segundo a Voz de Galicia) feito que non vimos reflexado en ningún outro medio de comunicación.

Hai moitas reseñas na rede sobre a os números de participantes de outras procedencias. E reséñanse con orgullo.

Ben. Aí os tendes: 30 galegos e galegas procedentes de:

Instituto de Investigacións marinas de Vigo

Universidade de Vigo

Instituto Oceanográfico da Coruña

Instituto Oceanográfico de Vigo

O que pon en valor decididamente a calidade da investigación mariña en Galicia, como non podía ser doutro xeito tendo en conta a nosa vocación marítima e mariñeira. Lembramos a concesión do Campus de excelencia ó proxecto presentado pola Universidade de Vigo, xa que no mundo somos unha referencia indiscutible.

Nestes intres está tamén na expedición acompañando ao Hespérides, o Sarmiento de Gamboa (tamén galego) cun equipo de investigación de homes e mulleres que a penas supera os 30 anos.

Pois iso. Para sentirnos orgullosos. Para pórnos en valor. E para perseguir soños. Porque a ciencia e a investigación son campos apaixoantes.

E se o tema é o mar... ¡aínda máis!

Funcionamento dunha central nuclear

2011-03-16T18:29:00.001+01:00

Como queira que estes días está no primeirísimo plano da actualidade, hoxe deixovos esta explicación moi, moi simple pero descriptiva de como funciona unha central nuclear. Estamos a escoitar seguido palabras como reactor, núcleo, refrixeración... Ben. Espero con este vídeo clarexar algunhas dúbidas.
Pero, como queira que o que coñecemos das centrais nucleares é o seu aspecto exterior, vouvos deixar tamén estoutro que explica QUE hai baixo cada unha desas formas que vemos.
Espero que esto axude a responder algunha das vosas preguntas. Nos días que veñen tentaremos tamén pór algo de luz sobre outros aspectos da enerxía nuclear.

Se queredes ir adiantando, podedes consultar a Galipedia

Outro modo de vela, outro modo de vivila

2011-03-15T12:44:00.001+01:00

Desde o IES da Fonsabrada, chéganos esta historia dun libro esquecido que tras percorrer boa parte do centro retorna ao seu lugar natural: a biblioteca.
Nela participa toda a comunidade educativa (profes, escolares, cociñeiras) e, con moito traballo e moito humor, van facendo un percorrido polo centro lembrando a CDU.
A nós gustounos moitiiiiiiiiiiiísimo.
E compartímolo con todos vos.
Está feito en forma de Lipdub, un formato moi acaído para o asunto. E, sobre todo, moderno, actual e divertido.
Porque as biblios teñen que ser así.

Para viaxar sen moverte do sofá

2011-03-12T20:24:00.006+01:00

Hoxe escoitamos falar destas dúas páxinas e fomos axiña coñecelas. Teñen, como comprobaredes, unha finalidade fundamentalmente turística pero a nós poden facernos moitos servizos.

Son www.descubregalicia.com e www.virtualplanet360.com

Unha delas serve para viaxar por algunhas vilas galegas (de momento 59 pero están en aumento) e a outra por vilas do mundo (de momento 39 de Europa e América do Sur)

Pode resultar moi útil para ver e facer como que paseamos por cidades que non coñecemos e que, por algunha razón entran nas currículas, ou para ver algunha igrexa por dentro(asunto que lle gustará ó nosos amigo Antonio), ou o Museo de Ferrari en Maranello, ou para prácticar idiomas (están en galego, inglés, francés e castelán)...

Están creadas por unha empresa de Pontevedra: Factoría Digital á que felicitamos desde aquí.
E agora, como Malpica aínda non está, ¿queredes facer unha visita a Pontemaceira, a Moaña, a Viveiro...? Pois, adiante!!!

Rescatámolas: xa están aquí

2011-03-09T12:10:00.002+01:00

Grazas á axuda dun bo amigo de Leo, conseguimos recuperar a páxina Pioneiras e volvemos facer o enlace dentro da WQ.
De modo que xa se pode volver usar tal e como foi concebida.
Disto tamén aprendemos algo: a rede móvese e os contidos son efímeros. Haberá, xa que logo, que establecer estratexias que nos permitan reter aquela información que consideramos valiosa.
Premendo sobrea imaxe podedes acceder a ela. Durante o resto do ano está enlazada no apartado Webquest e en Materiais.

Pioneiras, ¿onde están?

2011-03-08T10:50:00.001+01:00

Open publication - Free publishing - More muller

Estes son os resultados da webquest que fixemos no ano 2009 co mesmo título. Cando este curso a quixemos recuperar para traballar cos nosos escolares descuvrimos, con sorpresa, que a páxina web que era a principal fonte de información desapareceu.
Non o entendemos. As mulleres que alí aparecían (con foto e biografía) eran invisibles ata aquel momento e agora... volven á invisibilidade.
Lamentamos o feito e esperamos, de verdade, que se recupere aquela información e volva estar accesible.
Para as mulleres é importante. Para as galegas, é importante.
Para todos cantos tendes enlazada a nosa webquest, o novo aloxamento é ESTE

Entroido biolóxicamente diverso

2011-03-07T12:44:00.007+01:00

O tema ao que nos achegamos este ano foi a Biodiversidade. E cada aula interpretouno como mellor lle pareceu.
Tivemos animaliños (xoaniñas, mosquitos, vermes. abellas, bolborets, arañas e mouchos), árbores e flores (1º ciclo), científicos, gardabosques, robinhooces e labregos(3º ciclo)...
E, para rematar: filloas, orellas, rosquiñas...¡e música!
Deixovos unhas imaxes.

Bocaberta

2011-03-07T11:55:00.003+01:00

Esta semana chegou a Malpica o programa Bocaberta da SXPL, da man de Ed. Xerais.
A actividade estivo conducida polo Mago Cali e virou arredor do libro Contos por palabras de Agustín Fernández Paz.
O libro é un dos nosos favoritos e sempre figura nos listados dos máis lidos. No mes das Letras do 2000 fixemos entre todos unha recreación marabillosa escribindo un conto cada aula a partir dun anuncio da sección Por Palabras. Prometo que será dixitalizado para que o disfrutedes tamén neste formato... en canto haxa algo de tempo! Vai pola 16ª edición desde que saeu ó mercado. Na nosa biblio temos algún exemplar da 1ª edición.
O acto tivo lugar no centro cívico e compartímolo cos nosos compañeiros de 1º e 2º da ESO do Urbano Lugrís.

Pasámolo moi ben e, ademáis, recibimos cadanseu exeplar do libro nunha edición especial para a Campaña.

La estrella alcanzar

2011-03-03T11:50:00.001+01:00

Película pertencente ó Plan Nacional de Fomento da Lectura do Goberno de Chile.
Conta unha historia de amor e esperanza na que os libros e a lectura teñen moito que ver.
Eso do que sempre falamos: a compensación de desigualdades e a importancia do papel dos mediadores...é o eixo sobre o que xira esta conmovedora historia.
Deixovos os vídeos e o enlace ó caderno de traballo.

Caderno

Escoitade as nosas Carapuchiñas

2011-02-18T21:10:00.006+01:00

Os nenos e nenas de 6º andiveron a traballar sobre os diferentes puntos de vista que poden ter os sucesos.
Si. Calquera cousa que suceda será.... como a viviu quen nola conta.
E contaron as súas versións do conto de Carapuchiña Vemella.
Escoitade.

Venres: Unha de amor (1º)

2011-02-18T21:10:00.003+01:00

Unha de amor, da serie Os contos da rata Luísa, foi o texto escollido en 1º.
Así escoitamos como Luisa e Roxelio querían casar...¡e ó final conseguírono!
Un libro que fixo as delicias de tódolos pequenos.

E, con isto, rematou esta semana tan intensa.
Pasámolo ben. Desempolvamos libros.
Démoslles vida.
Houbo nervios (mesmo entre as profes!)
Pero, sobre todo, houbo moita alegría e moito gusto por facelo ben e agradar. E esas son virtudes moi importantes: aspirar a facer, calquera cousa que sexa a que fagamos, o mellor posible, perfeccionarnos cada día. E facer a vida agradable ó noso redor:

Alguén dá máis!

Pola nosa banda, prometemos repetir.

Venres: Amor de Mar (E.I. 5 anos)

2011-02-18T21:00:00.003+01:00

Trátase do libro de Miguel Desclot: Amor de mar (Baía Edicións)
Estes pequenos xa len. E están moi contentos de ter aprendido. Non é que o diga eu: só tendes que verlles as caras.
Contáronnos esta historia fermosa e quédanos o recordo: desde hoxe este non será un libro calquera para nós.

Xoves: Os pitiños (E.I. 4 e 5 anos)

2011-02-18T20:55:00.002+01:00

Así foi. Antes de Rosalía, puidemos escoitar esta coñecida conción de amor materno-filial nas voces dos máis pequenos:
Os pitiños fan
pío, pío, pío
cando teñen fame....

Seguide cantando!

Xoves: Rosalía de Castro (3º)

2011-02-18T17:09:00.004+01:00

Nenos e nenas de 3º, da man da súa profe, Tudita, agasalláronnos cun poema de Rosalía.
Non só recitaron, tamén nos agasallaron cuns corazóns fermosísimos que fixeran e cunha selección de citas literarias sobre o AMOR.
E pasámolo XENIAAAAAAAAAAL!

Mércores: Regueifa de Amor e desamor (6º)

2011-02-17T17:34:00.002+01:00

Aí os tedes! Dicíndose copliñas de amor e desamor. O certo é que o pasamos moi ben ensaiando, aprendendo...e dicíndoas!
Agora recollerémos máis entre as familias porque... habelas, hainas!
Deixovos o enlace ó caderno por se queredes miralo detidamente.
Ah! E podedes aportar as que saibades.

Martes: Antono Gracía Teijeiro en 4º

2011-02-16T21:03:00.002+01:00

A nós emocionáronnos os fermosos poemas de amor de Gª Teijeiro nas voces dos nosos nenos e nenas de 4º.
Un placer, sempre, escoitar poesía. Feita para pequenos e dita por eles.
O AMOR á súa medida.

Luns: A raposa cor de mel

2011-02-15T09:23:00.002+01:00

Os nenos e nenas de 5º, da man da súa profe, Chus, prepararon para todos nós esta deliciosa peza de Bernardino Graña.
Trátase dunha recreación do conto clásico da ratiña presumida, adiado no contido.

Podedes lelo na nosa biblio

Preparando a chegada do AMOR

2011-02-10T12:11:00.005+01:00

Niso andamos esta semana.
Os cursos que así o decidiron andan a prepara lecturas dramatizadas de textos que falan de AMOR para ofrecelas ós compañeiros e compañeiras na Hora de Ler da vindeira semana na biblioteca.
O almanaque previsto de actuacións é o seguinte:

Luns 14: A raposa cor de mel, por 5º nivel.
Martes 15: Poesías de Antonio GArcía Teijeiro, por 4º (A e B)
Mércores 16: Regueifa de Amor e Desamor, por 6º (A e B)
Xoves 17: Poema de Cantares Gallegos (Rosalía de Castro) por 3ª e A canción dos pitiños, por E.I.
Venres 18: Amor de Mar, por E.I. (5 e 3 anos) e Unha de amor, por 1º
Gústannos os poemas de amor, as cancións de amor, os libros que falan de amor... porque sentimos que se ese fora o motor de canto facemos...¿o mundo sería mellor!
Na biblioteca, estes días podedes disfrutar dunha selección de lecturas que dunha ou doutra maneira, falan sobre este tema. Coma sempre, son para ler aquí ou para levar e disfrutalas na casa. Como prefirades.
Enlazamos unha selección de libros feita polo Segrel e un fermosísimo caderno de poemas feita pola instituto de Camariñas

Toda a semana lendo pola PAZ

2011-01-30T13:19:00.009+01:00

Lecturas da PAZ

Así foi. Durante toda a semana e, no tempo da Hora de Ler, disfrutamos na biblioteca das lecturas que escolleron algúns cursos para compartir entre todos. Lecturas que falan de PAZ e dos valores que axudan a construíla.
Esas son as imaxes do tempo compartido. As lecturas foron:
4º-...Para morrer de risa, SÁNCHEZ, Gloria. No libro Tres triscadas. Xunta de Galicia
3º.- Kofu, o neno de chocolate, LORIGA, Guadalupe. Nova Galicia Edicións
6º.- La ovejita que vino a cenar, DREIDEMY, Joelle. Ed. Beascoa
5º.- A galiña da paz. SANCHEZ, Gloria, Ed. Rodeira
1º.- Cantamos xuntos: Uélé molibá mákási, en Canciones infantiles y nanas del bao-bá. Ed. Kókinos
2º.- A máscara do león, MARZO, Margarita del..., OQO Editora.

Fomos moi felices nestes ratos de letura que nos uniron cantando, rindo, escoitando...
Lembrámosvos que a selección de materiais aínda seguirá posta uns cantos días para seguila disfrutando.
A celebración serviunos, tamén para estrear a megafonía e as luces e dar aínda máis valor ó traballo que se fai nas aulas.
E agora.... a seguir!

Os Valores da PAZ

2011-01-28T16:37:00.006+01:00

Despois dunha semana reflexionando sobre a PAZ e o modo de chegar a ela, de vivir rodeados por ela... chegou o día de celebralo xuntos e poñer en común as nosas ideas.
En E. Infantil falaron sobre a XENEROSIDADE, en 1º sobre AMIZADE, en 2º sobre COOPERACIÓN.
Os de 3º reflexionaron sobre RESPECTO E TOLERANCIA, 4º sobre RESPONSABILIDADE, 5º sobre LEALDADE e, finalmente, 6º fíxoo sobre o ESFORZO.
Velaí algunhas das conclusións ás que chegaron:
5º.-Co amigo, garda a máxima fidelidade. Non enganes, non traizoes, dalle o teu apoio leal. Sen lealdade, non hai amizade.

6º.-A tendencia actual é que todo se pode acadar sen esforzo pero, en realidade, calquera logro require esforzarse.
Sacrificio, afán, alento, ánimo, coraxe, decisión, vontade, audacia, valentía... iso é o esforzo. Esforzámonos cando queremos acadar algo e sentimonos satisfeitos cando o facemos. Mandela, Ghandi, Teresa de Calcuta... traballaron moito por acadar a PAZ. E ti?

4º.-A responsabilidade sirvenos para asumir as consecuencias do que facemos.

E, agora.... ¡A FACER A PAZ!

Os Reis viñeron atrasados...¡Pero viñeron!

2011-01-23T20:34:00.000+01:00

Os Reis Magos tamén pasaron pola biblio anque con algo de retraso.
As súas Maxestades: Premio, Ministerio e Bibliotecas Escolares deixáronnos un marabillosos equipo de megafonía e iluminación para que poidades facer aínda mási bonitas esas lecturas que facedes, as representacións...¡o que queirades!
Eu estou moi, moi contenta porque sei que o ides disfrutar.
Ah! tamén deixaron esas pinguiñas nas cortinas que a min encántanme!

Lendo para pequenos

2011-01-21T16:20:00.002+01:00

Lendo para pequenos